上期話到A小姐喺神婆力催嘅東風幫助下，搵到一個條件十分優秀嘅男朋友，但正當神婆翹起雙手等飲佢地餐喜酒嘅時候，突然收到A小姐嘅電話，究竟A小姐打嚟所為何事呢？我地即刻開始今日嘅《全線大飲茶》！
啱啱將電話擺到耳邊，就聽到A小姐帶住哭腔嘅聲音。
A：戴師傅……
戴：咩事吖？A小姐，你好似有D問題咁嘅？
A：戴師傅……
戴：有事唔怕同我講吖。
A：戴師傅！！！！佢話要同我分手吖！！！
戴：……
A：佢要離開我喇！5555555……
戴：唔好咁激動住，你冷靜D先，究竟點解佢會同你講分手嘅？
A：佢……佢話我太細路女脾氣，咩都諗得好傻，咩都諗得好天真，完全唔知道考慮現實，鬱D唔順就發脾氣，話我好大小姐……
戴：（咁你又真係咁嘅……）
A：佢仲話我貪錢，貪慕虛榮，見到錢對眼就發曬青光。話頂我唔順，要同我分手吖！55555……
戴：你唔好……
A：你幫下我喇，戴師傅！我真係好唔捨得佢，我唔想同佢分手吖！
戴：我……
A：我唔要錢，唔要車，唔要樓，唔要鑽石，唔要名牌，我淨係想要翻呢個男人咋！你幫下我喇！
戴：……好好好，你唔好喊住先，我應承幫你，我應承幫你！
A：好，你話架，一定要架！
戴：我再去幫你搞搞你間屋嘅風水。但係事先聲明一點就係，如果佢真係變咗心，咁我唔敢擔保佢一定會翻嚟，但係我可以保證你可以係短期內搵到個同樣條件好好嘅男人囖，Okay？
A：唔得吖！我都話唔要其他男人，我淨係要佢咋！！
戴：得得得……
然後神婆再次喺A小姐嘅奪命追魂call之下，用光速趕到A小姐屋企，喺屋內某些地方有針對性咁再以加強。經過一番奔波勞碌，神婆終於可以拖住疲憊嘅身子踏上回家嘅路……
兩個禮拜後，A小姐打電話嚟報喜，話佢同男朋友已經複合翻，感情仲好過以前添，而A小姐亦都開始注意控制自己嘅脾氣，力求脫胎換骨咁嫁個有錢人！神婆為A小姐開心之餘，不期然覺得其實兩個人之間嘅相處，本嚟就係一筆無價嘅財富，或者開始時各自都會懷有自己嘅私慾，但慢慢都會被愛所融化所吸收，呢個或者就係愛之所以珍貴嘅原因啩。最後講翻句老土說話，希望天下有情人終成眷屬！
添加到百度搜藏
