上期话到A小姐喺神婆力催嘅东风帮助下，揾到一个条件十分优秀嘅男朋友，但正当神婆翘起双手等饮佢地餐喜酒嘅时候，突然收到A小姐嘅电话，究竟A小姐打嚟所为何事呢？我地即刻开始今日嘅《全线大饮茶》！
啱啱将电话摆到耳边，就听到A小姐带住哭腔嘅声音。
A：戴师傅……
戴：咩事吖？A小姐，你好似有D问题咁嘅？
A：戴师傅……
戴：有事唔怕同我讲吖。
A：戴师傅！！！！佢话要同我分手吖！！！
戴：……
A：佢要离开我喇！5555555……
戴：唔好咁激动住，你冷静D先，究竟点解佢会同你讲分手嘅？
A：佢……佢话我太细路女脾气，咩都谂得好傻，咩都谂得好天真，完全唔知道考虑现实，郁D唔顺就发脾气，话我好大小姐……
戴：（咁你又真系咁嘅……）
A：佢仲话我贪钱，贪慕虚荣，见到钱对眼就发晒青光。话顶我唔顺，要同我分手吖！55555……
戴：你唔好……
A：你帮下我喇，戴师傅！我真系好唔舍得佢，我唔想同佢分手吖！
戴：我……
A：我唔要钱，唔要车，唔要楼，唔要钻石，唔要名牌，我净系想要翻呢个男人咋！你帮下我喇！
戴：……好好好，你唔好喊住先，我应承帮你，我应承帮你！
A：好，你话架，一定要架！
戴：我再去帮你搞搞你间屋嘅风水。但系事先声明一点就系，如果佢真系变咗心，咁我唔敢担保佢一定会翻嚟，但系我可以保证你可以系短期内揾到个同样条件好好嘅男人囖，Okay？
A：唔得吖！我都话唔要其他男人，我净系要佢咋！！
戴：得得得……
然后神婆再次喺A小姐嘅夺命追魂call之下，用光速赶到A小姐屋企，喺屋内某些地方有针对性咁再以加强。经过一番奔波劳碌，神婆终于可以拖住疲惫嘅身子踏上回家嘅路……
两个礼拜后，A小姐打电话嚟报喜，话佢同男朋友已经复合翻，感情仲好过以前添，而A小姐亦都开始注意控制自己嘅脾气，力求脱胎换骨咁嫁个有钱人！神婆为A小姐开心之余，不期然觉得其实两个人之间嘅相处，本嚟就系一笔无价嘅财富，或者开始时各自都会怀有自己嘅私欲，但慢慢都会被爱所融化所吸收，呢个或者就系爱之所以珍贵嘅原因啩。最后讲翻句老土说话，希望天下有情人终成眷属！
添加到百度搜藏
