嫁個有錢人（中）

本嚟打算兩個禮拜後先到佢屋企幫佢睇下風水。但喺A小姐急催之下，都要提前到幾日過去。睇得出A小姐真係好急做闊太……

A：哎呀﹗戴師傅你終於都嚟喇，我等咗你好耐喇，快D入嚟喇！

戴：好好好﹗

A：我特登請咗日假叫你上嚟睇風水。呢次真係關乎到我成個人生架﹗我下半世食粥食飯靠曬你架喇﹗戴師傅，你一定要出儘力嚟幫我引曬D東風過嚟吖！

戴：係﹗係﹗盡量﹗

喺A小姐嘅住宅內仔細咁行咗一轉，連每個角落都唔放過，終於畀神婆搵到催起東風嘅至強方式！

戴：其實呢，桃花系分為三種嘅，人緣桃花、貴人桃花同埋姻緣桃花。你想催旺邊種桃花先？

A：er…有乜唔同架呢三種桃花？

戴：想自己人見人愛，車見車載就要人緣桃花旺呀﹗例如你係做sales或者自己做老細，咁就成日都要接觸好多人架嘛﹗人緣桃花旺即係人緣好，多D人LIKE自己。做娛樂圈最需要嘅就係呢種喇﹗

A：哇，呢個正！呢個我要吖！

戴：唔使心急﹗等我講埋先。如果成日做乜都覺得好多阻滯。即係貴人唔夠啦﹗咁就要整旺個貴人桃花。令你多D貴人幫。

A：係吖﹗我平時成日有D三姑六婆講我壞話架﹗戴師傅吖，呢只貴人桃花都幫我催埋喇﹗

戴：咁至於最後嘅姻緣桃花，就當然係關係到拍拖同埋結婚喇，我諗都唔需要多講喇﹗

A：咁吖，咁就咩桃花都催旺曬佢喇，總之戴師傅你幫我盡力催就得。

戴：…咁樣唔得架﹗要分先後同埋輕重。咁先有效果架﹗如果唔理好醜，一昧幫你喪催桃花。盞整埋D劫財劫色桃花都過埋嚟。出面有好多人咪就係咁囉﹗睇完之後仲衰。

A：……咁點算好吖？我唔想要D唔好嘅桃花吖！

戴：你聽我講就無錯架啦。先將你床頭擰去個一邊。落床要喺呢邊落。露台呢度擺幾盤大紅花。餐台呢擺個陶瓷做嘅果盤，仲有呢度呢度要咁咁咁……咁就掂曬！

A：咁就可以搵到個有錢人喇？

戴：到時候追你嘅人多到從香港排到去離島吖，你想要咩類型都有得你揀吖！

話口未完，A小姐已經拉咗神婆出去買擺設用品……

三個禮拜后，A小姐請神婆出去high tea。神婆去到時先至發現A小姐身邊已經坐咗位睇落都頗為氣宇軒昂嘅仁兄。趁位仁兄行開嘅時候，A小姐就偷偷地咁同神婆講。

A：我覺得佢都幾好呀﹗你覺得佢點吖？

戴：呵，你中意咪得囖。其實你心入面一早就有咗答案喇，係咪？