嫁个有钱人（中）

本嚟打算两个礼拜后先到佢屋企帮佢睇下风水。但喺A小姐急催之下，都要提前到几日过去。睇得出A小姐真系好急做阔太……

A：哎呀﹗戴师傅你终于都嚟喇，我等咗你好耐喇，快D入嚟喇！

戴：好好好﹗

A：我特登请咗日假叫你上嚟睇风水。呢次真系关乎到我成个人生架﹗我下半世食粥食饭靠晒你架喇﹗戴师傅，你一定要出尽力嚟帮我引晒D东风过嚟吖！

戴：系﹗系﹗尽量﹗

喺A小姐嘅住宅内仔细咁行咗一转，连每个角落都唔放过，终于畀神婆揾到催起东风嘅至强方式！

戴：其实呢，桃花系分为三种嘅，人缘桃花、贵人桃花同埋姻缘桃花。你想催旺边种桃花先？

A：er…有乜唔同架呢三种桃花？

戴：想自己人见人爱，车见车载就要人缘桃花旺呀﹗例如你系做sales或者自己做老细，咁就成日都要接触好多人架嘛﹗人缘桃花旺即系人缘好，多D人LIKE自己。做娱乐圈最需要嘅就系呢种喇﹗

A：哇，呢个正！呢个我要吖！

戴：唔使心急﹗等我讲埋先。如果成日做乜都觉得好多阻滞。即系贵人唔够啦﹗咁就要整旺个贵人桃花。令你多D贵人帮。

A：系吖﹗我平时成日有D三姑六婆讲我坏话架﹗戴师傅吖，呢只贵人桃花都帮我催埋喇﹗

戴：咁至于最后嘅姻缘桃花，就当然系关系到拍拖同埋结婚喇，我谂都唔需要多讲喇﹗

A：咁吖，咁就咩桃花都催旺晒佢喇，总之戴师傅你帮我尽力催就得。

戴：…咁样唔得架﹗要分先后同埋轻重。咁先有效果架﹗如果唔理好丑，一昧帮你丧催桃花。盏整埋D劫财劫色桃花都过埋嚟。出面有好多人咪就系咁囉﹗睇完之后仲衰。

A：……咁点算好吖？我唔想要D唔好嘅桃花吖！

戴：你听我讲就无错架啦。先将你床头拧去个一边。落床要喺呢边落。露台呢度摆几盘大红花。餐台呢摆个陶瓷做嘅果盘，仲有呢度呢度要咁咁咁……咁就掂晒！

A：咁就可以揾到个有钱人喇？

戴：到时候追你嘅人多到从香港排到去离岛吖，你想要咩类型都有得你拣吖！

话口未完，A小姐已经拉咗神婆出去买摆设用品……

三个礼拜后，A小姐请神婆出去high tea。神婆去到时先至发现A小姐身边已经坐咗位睇落都颇为气宇轩昂嘅仁兄。趁位仁兄行开嘅时候，A小姐就偷偷地咁同神婆讲。

A：我觉得佢都几好呀﹗你觉得佢点吖？

戴：呵，你中意咪得囖。其实你心入面一早就有咗答案喇，系咪？