知好? 唔知好?

“平生無做衰嘢。但點解就咁“黑仔”? ”

“明明生肖運程話我今年好。咪又係咁(衰)"   

“我都有拜神裝香。但點解就不見好? 個個都保佑。就係唔保佑我﹗”

“師傅話我邊年邊年會遇到真命天子。個年唔結。下一次就係幾時幾時”

呢d係經常聽到嘅說話。黑仔永遠唔知自己點解黑仔。拜神爭上頭注香為博好運。俗語講“行衰運先會去算命架啫﹗好運又有咩好問呀﹗”

叻嘅算命師傅係可以令你知道將來會發生咩事。好嘅固然好。但唔好點算? 點避呢? 知道咗﹐解決唔到咪又係無用﹗真係唔知好過知啦﹗知咗仲會"形"住。坊間算命師傅算完話你有個劫。會離婚。會破財。有血光。客人覺得佢講之前個d都準。聽咗就會不安。隨即師傅就會話幫你擺個陣化咗佢。除咗擺陣(風水)﹐仲有法事﹐改名等等。收返你若干錢。唔做﹐又唔心安。做﹐又肉赤。最後﹐都係做。因為 --- 唔怕一萬。只怕萬一。

過去嘅事邊個都改唔到。但將來仲未發生嘅係絕對可以改變。關鍵係方法一定要正確。點知正唔正確? 有無立刻明顯好轉咪就係答案囉﹗可唔可以有效先比錢? 又或者淨收利是? 下次問下你個師傅

算命算得準。唔駛開心﹗亦唔駛讚個師傅勁。原因係 ---
(1) 算得準代表你一生好事做得唔多。平平無奇。

算命算得唔準。亦唔駛唔開心﹗更唔駛鬧個師傅。原因係 ---
(2) 算咗好嘅唔發生。衰嘅中曬。代表你壞事做得夠多。d福抵銷曬。
(3) 算咗壞嘅唔發生。好嘅更好。恭喜你﹗你廣作善事。隨喜﹗隨喜﹗

明未呀﹐各位大朋友?