其實從面相和掌相是可以看到閣下近期是會得財定是破財的。

得財氣色﹕

額頭反光

一個人行好運自然財源滾滾來，最容易睇人行唔行運就係睇人個額頭，若果閣下個額頭係唔需要搽潤膚膏都可以在燈光底下反曬光的話，閣下就係行緊好運，亦即是可以賺到錢。

鼻樑潤白

若果閣下一早起身，照鏡時發覺自己的鼻樑潤白，而不是蒼白的話，便要恭喜閣下，因這是得意外之財的氣色。

掌心潤白

若果閣下近排發覺自己掌心潤白，而不是蒼白，就要恭喜閣下，因這是稱為”符碌得財掌”的氣色，即是符符碌碌，不用辛苦，便可賺錢。


破財氣色﹕

額頭暗啞無光

一個人行衰運自然會破財，最容易睇人行衰運就係睇人個額頭，若果閣下個額頭係搽極潤膚膏都在燈光底下暗啞無光的話，閣下就係行緊衰運，亦即是會破財。

鼻毛突出

若果閣下一早起身，照鏡時發覺自己的鼻毛突出，便要留意，因該日會破財，應盡量駛錢在有用的地方及盡快除去該突出的鼻毛，古語云﹕「財留不住無他是，只因倉庫(鼻)有長槍(鼻毛)。」

鼻翼生暗瘡

鼻翼係相學中為錢的倉庫，若閣下在鼻翼生暗瘡，即是錢的倉庫穿窿，便會破財了。