昨日讀了兩篇報章專訪，有點感觸，又有點得着。
一篇訪問一位八十後青年，弱視但天生喜歡設計。多次報考大學設計系不成功，轉入IVE，為家庭邊讀書邊打工，見盡職場人情冷暖。最後入到某著名設計師樓工作，學師幾年創業，現在成為行內頗有的名氣設計師，被香港及外地設計雜誌譽為亞洲設計界明日之星，亦買了一層樓。
（明報原文）
另一篇訪問田北俊，其人生態度為hea住做。不求考第一，不求高分，入唔到HKU唔緊要，還可以到美國讀大學。不用睇權貴面色，生活無憂。
（信報原文）
同一日兩篇訪問，會令人有咩感想呢？相信不離：
一，好命真好，可以生在有錢家庭（雖然，田大少出生時家境不算富裕），肯定有書讀，又唔洗捱，證明好命就成功了一半；
二，不必信（認）命，因為靠努力都可以有出頭天。就算家境不好，只要上進，一樣可以幹出成績。
人生軌跡
兩個睇法大相逕庭，但其實無衝突。相信命理，不等於信宿命。開一張命盤，睇到的不是你一定會PK，或者嫁個幾有錢嘅老公。越睇得多命，就越會發現，命盤只是一堆可能性，交織出一條人生軌跡。但我們不一定要跟住軌跡走，正如眾多數據分析都話某人會勝出選舉，但一樣可以出現黑天鵝。
那位弱視設計師，可能天生八字已經唔靚。一般人報名入大學，一次唔得試多一次都失敗，相信都已經放棄，為家庭生活只好打份穩定收入的工。這些可能已在他的八字反映。但他竟然唔放棄，先入IVE半工讀，再報第三次名。第三次申請都失敗，咁一般人應該死心，但佢竟然都無放棄做設計師。入到大公司，好多人但求做到高層，人工一定幾好，但佢又決心出嚟創業，冒輸身家嘅風險，仲要份身家根本唔多。
命理可能話佢命途坎坷，但八字唔會講到明佢一定做唔到設計師。算命可能話佢三十歲後較好，但究竟係打份工一世有飯食嗰種好呢，定係創業嗰種好呢？相信命盤無限定你行邊條路，兩條路對一般人都算好。
如果佢努力，但放在死讀傳統中學；佢堅持，但用喺追求入大學讀會計呢？可能真的死路一條。佢唔知自己有設計天份而放棄呢，咁自然只能過平凡生活。佢誤信庸師，以為自己係田北俊條命，坐喺度等富貴呢？咁更加唔洗講。
即使你的命真的富貴如田大少，人生做錯些少決定，或者生於動盪時代，可能已萬劫不復，只是他們安全系數高一點而已。要成功，努力是條件之一，好命也是條件之一，其實還有更多條件，例如個人天份、大環境等等。
我寧願相信，命理不是用來睇你幾時必然發達或PK，而係告訴你個人特質如何，結合命途有哪些可能性，讓你取長補短，行少啲冤枉路，行最有利的路。不是命理無用，是人們不懂得如何用。明師可以說出你上半生如何，因為大部份人都按人生最大路的軌跡來行。肯走出自己的路，始終是少數。懂得如何走，更是萬中無一。
攻與守、進與退
幾時攻，幾時守；如何進，如何退，都是人生關鍵。忽然明白，學算命時師父經常教的、最重要的概念，其實就是這一點，而不是格局、星情。
拿捏進與退，就是學算命、學做人。一點淺見。
添加到百度搜藏
